2017-ci ilin dekabr ayının 2-4 tarixlərində İran İslam Respublikasının Sərhəd Qoşunlarının Komandanı general-mayor Qasım Rzayinin dəvəti ilə general-polkovnik Elçin Quliyevin rəhbərliyi ilə Dövlət Sərhəd Xidmətinin nümayəndə heyəti Tehran şəhərinə rəsmi səfər etmişdir.
Səfər çərçivəsində general-mayor Qasım Rzayi və İran İslam Respublikasının Silahlı Qüvvələrinin Baş Qərargah rəisi general-polkovnik Məhəmməd Hüseyn Bagiri ilə görüşlər keçirilmişdir.
Görüşlər zamanı Azərbaycan Respublikası və İran İslam Respublikasının dövlət başçıları arasında keçirilmiş görüşlərdə qəbul olunmuş qərarların böyük əhəmiyyət kəsb etməsi vurğulanmış, ölkələrimiz arasındakı tarixi, dini, mədəni, iqtisadi münasibətlərin gündən-günə inkişaf edərək möhkəmlənməsi, sərhəd qurumları arasında mövcud əlaqələrin yüksək səviyyədə olması ifadə olunmuşdur.
Müzakirələr zamanı dövlət sərhədində, dövlət sərhədindən buraxılış məntəqələrində və Xəzər dənizində şərait, habelə onun növbəti dövrdə inkişaf tendensiyaları barədə fikir mübadiləsi aparılmışdır. Sərhəd təhlükəsizliyinə təhdidlərə, o cümlədən beynəlxalq terrorçuluğa, narkotik vasitələrin qanunsuz dövriyyəsinə, qaçaqmalçılığa, qeyri-leqal miqrasiyaya və digər transsərhəd cinayətlərə qarşı birgə mübarizənin aparılmasının vacibliyi qeyd edilmişdir.
Ermənistan tərəfindən 20% torpaqlarımızın işğalı nəticəsində Azərbaycan-İran sərhədinin 132 km hissəsinin nəzarətsiz qalmasının ciddi narahatçılıq doğurması İran tərəfinin diqqətinə çatdırılmışdır.
Azərbaycan Respublikası və İran İslam Respublikası üçün mühüm iqtisadi əhəmiyyət kəsb edən “Şimal-Cənub” nəqliyyat dəhlizinin tərkib hissəsi kimi “Astara” dəmir yolu buraxılış məntəqəsinin fəaliyyətinin təşkili, yüklərin və nəqliyyat vasitələrinin sərhədkeçmə prosedurlarının sadələşdirilməsi və sərhəd təhlükəsizliyi tədbirlərinin gücləndirilməsi məsələləri ətrafında fikir mübadiləsi aparılmışdır.
Hər iki ölkə vətəndaşlarının rahat səyahət etməsi, o cümlədən turizmin inkişafı məqsədi ilə “Astara” və “Biləsuvar” dövlət sərhədindən buraxılış məntəqələrinin iş vaxtının uzadılmasının məqsədə uyğunluğu qeyd olunmuşdur.
Qarşılıqlı əməkdaşlığın müsbət göstəricisi kimi nümayəndə heyətləri tərəfindən əvvəlki illərə nisbətən 2017-ci ildə dövlət sərhədindən keçən şəxslərin və nəqliyyat vasitələrinin həcminin artması, sərhəd pozma hallarının isə iki dəfə azalması vurğulanmışdır.
Dövlət Sərhəd Xidmətinin Mətbuat Mərkəzi