Azərbaycan Respublikasının dövlət müstəqilliyinin bərpa edilməsindən sonra milli suverenliyin möhkəmləndirilməsi, dövlətin əsas rəmzlərindən olan dövlət sərhədinin etibarlı mühafizəsinin təşkili, qonşu ölkələrlə dövlət sərhədlərinin müəyyənləşdirilməsi dövlət siyasətinin əsas prioritet sahələrindən biri olmuşdur.
Dahi Öndər Heydər Əliyevin təməlini qoyduğu və Azərbaycan Respublikasının Prezidenti, Silahlı Qüvvələrin Ali Baş Komandanı cənab İlham Əliyevin uğurla davam etdirdiyi milli sərhəd strategiyası sərhəd siyasətinin konseptual əsaslarını təsbit etmiş, dövlət sərhədinin mühafizəsi üzrə qarşıda duran vəzifələri müəyyənləşdirmişdir.
Həmsərhəd ölkələr arasında ilk olaraq, Azərbaycan-Rusiya dövlət sərhədinin müəyyənləşdirlməsi prosesinə 1996-cı ildən etibarən başlanılmış və 14 illik birgə fəaliyyət uğurla yekunlaşdırılaraq 3 sentyabr 2010-cu il tarixdə “Azərbaycan Respublikası və Rusiya Federasiyası arasında dövlət sərhədi haqqında” dövlətlərarası müqavilə imzalanmışdır.
Milli dövlətçilik tarixində ilk dəfə olaraq Azərbaycan Respublikasının Rusiya Federasiyası ilə dövlət sərhədinin rəsmən müəyyən edilməsi Azərbaycan Respublikasının Prezidenti, Silahlı Qüvvələrin Ali Baş Komandanı cənab İlham Əliyevtərəfindən ardıcıl və məqsədyönlü şəkildə uzun illər ərzində həyata keçirilən dövlət siyasətinin real nəticəsi, Rusiya Federasiyası ilə ikitərəfli münasibətlərin dostluq və strateji tərəfdaşlıq səviyyəsinə yüksəlməsinin daha bir göstəricisi, milli diplomatiyamızın növbəti uğuru olmuşdur.
Müqavilənin icrası çərçivəsində demarkasiya işçi qruplarının fəaliyyətinin təşkili, dövlət sərhədlərinin ərazidə işarələnməsi, sərhəd nişanlarının quraşdırılmasına hazırlıqla bağlı zəruri işlərin görülməsi təmin olunmuşdur.
2018-ci ilin fevral ayının 22-də Qusar rayonunun Zuxul kəndi ərazisində Azərbaycan Respublikasının Rusiya Federasiyası ilə dövlət sərhədində ilk sərhəd nişanının təntənəli quraşdırılması mərasimi keçirilmişdir.
Azərbaycan Sərhəd Mühafizəsi tarixinin ən əlamətdar hadisələrindən biri olan bu təntənəli mərasimdə Azərbaycan Respublikasının Dövlət Sərhəd Xidmətinin və Rusiya Federasiyasının Federal Təhlükəsizlik Xidmətinin Sərhəd Xidmətinin nümayəndə heyətləri, Azərbaycan Respublikası və Rusiya Federasiyası arasında dövlət sərhədinin delimitasiyası və demarkasiyası üzrə Dövlət Komissiyalarının üzvləri iştirak etmişlər.
Azərbaycan Respublikasının Rusiya Federasiyası ilə dövlət sərhədində ilk sərhəd nişanı quraşdırıldıqdan sonra Azərbaycan Respublikasının Dövlət Sərhəd Xidmətinin rəisi general-polkovnik Elçin Quluyev, Azərbaycan Respublikası Xarici İşlər Nazirinin müavini – Azərbaycan Respublikasının Rusiya Federasiyası ilə dövlət sərhədinin delimitasiyası və demarkasiyası üzrə Dövlət Komissiyasının sədri cənab Xələf Xələfov, Rusiya Federasiyasının Azərbaycan Respublikası ilə dövlət sərhədinin delimitasiyası və demarkasiyası üzrə Dövlət Komissiyasının sədri cənab Vadim Postnov, Rusiya Federasiyasının Federal Təhlükəsizlik Xidmətinin Sərhəd Xidmətinin nümayəndə heyətinin rəhbəri general-leytenant Aleksey Buyerov çıxış etmişlər.
Çıxışlarda Azərbaycan Respublikasının Prezidenti, Silahlı Qüvvələrin Ali Baş Komandanı cənab İlham Əliyevin qətiyyətli siyasəti, Azərbaycan Respublikasının dövlət maraqlarının ardıcıl və məqsədyönlü müdafiəsi sayəsində Rusiya Federasiyası ilə dövlət sərhədlərimizin delimitasiyası və demarkasiyası üzrə fəaliyyətin artıq son mərhələyə qədəm qoyması, bu hadisənin Azərbaycan Respublikası ilə Rusiya Federasiyası arasında dövlətlərarası münasibətlərin mehriban qonşuluq və dostluq, strateji tərəfdaşlıq və qarşılıqlı faydalı əməkdaşlıq səviyyəsinin növbəti nümayişi olması vurğulanmış, dövlət sərhədinin demarkasiyası işlərinin ən yaxın zamanlarda uğurla başa çatdırılacağı qeyd olunmuşdur.
Dövlət Sərhəd Xidmətinin mətbuat mərkəzi