Azərbaycan xalqının ümummilli lideri Heydər Əliyevin irsinin və Dahi Öndərin banisi olduğu milli dövlətçiliyimizin təşəkkül tarixinin öyrənilməsi Azərbaycan sərhədçilərinin hərbi vətənpərvərlik tərbiyəsinin əsasını təşkil edir.
Dövlət Sərhəd Xidmətinin “Heydər Əliyev elmi araşdırmalar mərkəzi”nin dəstəyi və təşkilatçılığı sayəsində bütün hərbi hissələrdə, xüsusilə də Dövlət Sərhəd Xidmətinin Akademiyasında və Xüsusi Məktəbində Dahi Öndərin həyat salnaməsinin, təhlükəsizlik orqanlarında xidmət illərinin və siyasi fəaliyyətinin, sərhəd təhlükəsizliyi konsepsiyasının banisi kimi Azərbaycan Sərhəd Mühafizəsi tarixindəki müstəsna xidmətlərinin tədqiq edilməsinə, gənc nəslin Heydər Əliyev ideyalarına sadiqlik ruhunda tərbiyəsinə ciddi önəm verilir.
Noyabr ayının 11-də 44 ali təhsil müəssisəsinin iştirak etdiyi, Heydər Əliyev Mərkəzinin və Azərbaycan Respublikasının Təhsil Nazirliyinin dəstəyi ilə keçirilən “Heydər Əliyev və Azərbaycan tarixi” IV ümumrespublika bilik yarışında Dövlət Sərhəd Xidmətinin Akademiyası 35 xalla 1-ci yerə yüksəlmişdir.
Dahi Öndər Heydər Əliyevin irsinin öyrənilməsi istiqamətində həyata keçirilən tədbirlərin səmərəliyinin mühüm göstəricisi olan bu qələbə xəbərini Dövlət Sərhəd Xidmətinin şəxsi heyəti böyük sevinc və qürur hissi ilə qarşılamışdır.
Noyabr ayının 13-də Dövlət Sərhəd Xidmətinin rəisi general-polkovnik Elçin Quliyev bilik yarışının qaliblərini və onları hazırlamış müəllim heyətini qəbul etmişdir.
General-polkovnik Elçin Quliyev kursantları və onların müəllimlərini qələbə münasibətilə səmimi təbrik etmiş, Azərbaycan Sərhəd Mühafizəsinin təşəkkülündə və formalaşmasında Heydər Əliyevin müstəsna rolunu xüsusi qeyd etmişdir. 2014-cü ildən etibarən keçirilən bu bilik yarışında DSX Akademiyasının daima ilk beşlikdə yer tutması, ötən il 2-ci yerə, bu dəfə isə 1-ci pilləyə yüksəlməsi gənc sərhədçi nəslinin hərbi vətənpərvərlik və Heydər Əliyev ideyalarına sadiqlik ruhunda tərbiyəsi sahəsində qazanılmış ciddi uğur kimi qiymətləndirilmişdir.
“Heydər Əliyev və Azərbaycan tarixi” IV ümumrespublika bilik yarışında yüksək bilik və əzmkarlıq nümayiş etdirərək ən yüksək nəticə göstərmiş kursantlar və müəllimlər dövlət təltifləri və fəxri fərmanlar ilə mükafatlandırılmışlar.
Dövlət Sərhəd Xidmətinin Mətbuat Mərkəzi
