2011-ci ildən başlayaraq Dövlət Sərhəd Xidmətinin hərbi hissə və bölmələrində keçirilən və artıq ənənəyə çevrilmiş “Valideyn günləri” müddətli həqiqi hərbi xidmət hərbi qulluqçuları ilə təlim-tərbiyə işinin səmərəliliyinin yüksəldilməsi, şəxsi heyətin vətənpərvərlik ruhunda tərbiyə edilməsi və hərbi kollektivlərdə sağlam mənəvi mühitin yaradılması üçün mühüm əhəmiyyət kəsb edir, hərbi hissələrlə valideynlər arasında əlaqələri gücləndirir.
Novruz bayramı ərəfəsində Dövlət Sərhəd Xidmətinin Bakı, Horadiz, Göytəpə, Lənkəran, Xudat, Şəki, Zaqatala, Şəmkir, Yevlax qarnizonlarında təşkil olunan “Valideyn günləri”ndə əsgərlər xalqımızın milli ənənələri sırasında mühüm yer tutan, Vətənə məhəbbət, həmrəylik, xeyirxahlıq kimi mənəvi-əxlaqi keyfiyyətlər aşılayan Novruz bayramının sevincini valideynləri ilə birgə yaşamışlar. Tədbirlərdə Dövlət Sərhəd Xidmətinin rəisi – Sərhəd Qoşunlarının Komandanı general-polkovnik Elçin Quliyev, Dövlət Sərhəd Xidməti rəisinin müavinləri və digər rəhbər vəzifəli şəxslər iştirak etmişlər.
“Valideyn günləri”ndə qonaqlara öncə hərbi hissə barəsində ümumi məlumat verilmiş, valideynlər əsgərlər üçün yaradılmış xidmət və məişət şəraiti ilə yaxından tanış olmuşlar. Tədbirlərin rəsmi hissəsində Azərbaycan Respublikasının Prezidenti cənab İlham Əliyevin Vətənimizin sərhədlərinin mühafizəsinə göstərdiyi ali diqqət və qayğı nəticəsində sərhəd mühafizə sisteminin təkmilləşdirilməsi istiqamətində qazanılan uğurlar haqqında valideynlərə ətraflı məlumat verilmiş, əsgərlərin müddətli hərbi xidməti dövründə valideynlərin və hərbi kollektivin üzərinə düşən vəzifələr barədə fikir mübadiləsi aparılmış, sərhədçilərin xidməti şəraiti barədə qonaqların fikirləri dinlənilmişdir.
Xidmətdə fərqlənən əsgərlər Fəxri Fərmanlarla, “Xidmətdə fərqlənmiş sərhədçi” döş nişanları ilə, Döyüş Bayrağı önündə çəkilən fotoşəkillərlə, qiymətli hədiyyələrlə təltif olunmuşlar, onların valideynlərinə «Təşəkkür məktubları» təqdim edilmişdir.
Valideynlər əsgər yeməkxanasında bayram süfrəsi arxasında övladları ilə birgə nahar etdikdən sonra incəsənət ustalarının iştirakı ilə konsert proqramları təşkil edilmiş, maraqlı və rəngarəng mədəni-kütləvi tədbirlər keçirilmişdir.
Dövlət Sərhəd Xidmətinin mətbuat mərkəzi