2014-cü ilin sentyabr ayı ərzində dövlət sərhədinin etibarlı mühafizəsinin təmin edilməsi, qaçaqmalçılığa, qeyri-leqal miqrasiyaya, narkotik vasitələrin qanunsuz dövriyyəsinə qarşı mübarizə tədbirləri uğurla davam etdirilmiş və dövlət sərhədini pozmuş 50 nəfər saxlanılmışdır.
Sərhəd pozucularının 24 nəfəri Azərbaycan Respublikası, 9 nəfəri Əfqanıstan, 8 nəfəri Özbəkistan, 3 nəfəri Moldova, 2 nəfəri İran İslam Respublikası, 2 nəfəri Ukrayna, 1 nəfəri Gürcüstan, 1 nəfəri İspaniya vətəndaşı olmuşdur.
Sərhədboyu rejim qaydalarını pozduqlarına görə 11 halda 14 nəfər, Xəzər dənizində isə 9 halda 11 nəfər inzibati məsuliyyətə cəlb olunmuşdur.
Sərhəd nəzarəti məntəqələrində dövlət sərhədindən keçməyə cəhd edərkən axtarışda olan 231 nəfər aşkarlanaraq aidiyyəti orqanlara təhvil verilmişdir.
Narkotik vasitələrin qeyri-qanuni dövriyyəsinə qarşı mübarizə tədbirləri nəticəsində 12 halda ümumilikdə 12 kiloqram 615,8 qram narkotik maddənin dövlət sərhədindən qanunsuz keçirilməsinin qarşısı alınmışdır. O cümlədən:
- 03.09.2014-cü il tarixdə Cəlilabad rayonu ərazisində “Ələt-Astara” magistral yolunun 136-cı kilometrliyində gizlədilmiş halda 1 kq marixuana aşkar olunmuşdur;
- 12.09.2014-cü il tarixdə əməliyyat məlumatı əsasında Biləsuvar rayonu ərazisində avtomobil yolunun kənarında axtarış apararaq xüsusi gizlədilmiş bir ədəd bağlamanı götürmüş Bakı şəhər sakini 1974-cü il təvəllüdlü İsmayılov Mahir Arif oğlu, Sumqayıt şəhər sakini 1971-ci il təvəllüdlü Hüseynov İlham Sahib oğlu saxlanılmışlar. Bağlamada 3 kq tiryək, 300 qram kakos, 70 qram “Metadon” suyu, 9 “Metadon” həbi aşkar olunmuşdur;
- 20.09.2014-cü il tarixdə Füzuli rayonunun Böyük Bəhmənli kəndinin yaxınlığındakı sərhəd zastavasının xidməti ərazisində 190 qram heroini qaçaqmal qismində dövlət sərhədindən qanunsuz olaraq keçirmiş 1 nəfər İİR vətəndaşı Rövşən Çeşm Bəhmən Mirəli saxlanılmışdır;
- 22.09.2014-cü il tarixdə Biləsuvar rayonunun Biləsuvar kəndinin yaxınlığındakı sərhəd zastavasının xidməti ərazisində 2,3 kq tiryək, 200 qram heroini qaçaqmal qismində qanunsuz olaraq Azərbaycan Respublikası ərazisinə keçirmiş 1 nəfər İİR vətəndaşı Həmami Məhəmməd Güləhməd saxlanılmışdır;
- 23.09.2014-cü il tarixdə Biləsuvar rayonunda Biləsuvar kəndinin yaxınlığındakı sərhəd zastavasının xidməti ərazisində 2 kq tiryək, 2 kq həşiş, 200 qram marixuana və 120 qram heroini qaçaqmal qismində qanunsuz olaraq ölkə ərazisinə keçirmiş 1 nəfər AR vətəndaşı Culfa rayon sakini Həsənov Mehman Mehbalı oğlu saxlanılmışdır.
Bütün cinayət faktları üzrə əməliyyat-istintaq tədbirləri davam etdirilir.
Dövlət sərhədindən buraxılış məntəqələrində gömrük əməkdaşları ilə birlikdə dövlət sərhədindən keçən şəxslər üzərində keçirilən baxışlar zamanı 7 halda narkotik vasitə aşkar olunmuşdur.Belə ki, ay ərzində:
- “Biləsuvar” SNM-də 4 halda 395 qram tiryəkin , “Astara” SNM-də 1 halda 95 konbalut “Metadon” həbinin qanunsuz olaraq dövlət sərhədindən keçirilməsinin qarşısı alınmışdır;
- “Samur” SNM-də ölkəyə daxil olan nəqliyyat vasitələrində 2 halda cəmi 800 qram marixuana aşkar olunmuşdur.
Sentyabr ayı ərzində qaçaqmalçılıq fəaliyyətinə qarşı mübarizə tədbirləri nəticəsində 39 halda ümumi dəyəri 231 min manat olan qaçaqmal, o cümlədən 888 ədəd RF istehsalı olan səsyazma cihazı, 172 ədəd yanğın təhlükəsizlik cihazı, 1 ədəd planşet, 1708 ədəd ətir, 5 ədəd mobil telefon, 382 şüşə müxtəlif markalı içkilər, 1000 ədəd spirtli içkilər üçün aksiz marka, 237 ədəd qapaq, 5113 ədəd müxtəlif markalı siqaret, 200 kq bal, 8299 ədəd pirotexniki vasitə, 2 ədəd qayıq, müxtəlif dərman preparatları və sənaye malları saxlanılmışdır.
Dövlət sərhədlərimizin etibarlı mühafizəsinin təşkili istiqamətində tədbirlər davam etdirilir.
Dövlət Sərhəd Xidmətinin mətbuat mərkəzi