Azərbaycan Respublikasının Dövlət Sərhəd Xidməti tərəfindən etibarlı sərhəd mühafizəsinin təmin edilməsi sahəsində tədbirlər davam etdirilir.
Son günlərdə DSX əməkdaşlarının sayıqlığı və peşəkarlığı sayəsində Sərhəd Qoşunlarının “Şəmkir” sərhəd dəstəsinin xidməti ərazisində külli miqdarda pirotexniki vasitələrin ölkə ərazisinə qaçaqmal yolu ilə gətirilməsinin qarşısı alınmış, “Göytəpə” və “Zaqatala” sərhəd dəstələrinin xidməti ərazilərində dövlət sərhədini pozmağa cəhd edən 2 nəfər şəxs saxlanılmışdır. Belə ki,:
- 25 sentyabr tarixində Gürcüstan ilə dövlət sərhədində Ehram çayının axını ilə müqabil ölkə ərazisindən üzüb gələn 1 ədəd göy rəngdə çəllək aşkar olunmuşdur. Çəlləyə baxış keçirilən zaman 22800 ədəd “Enigma” markalı pirotexniki vasitə aşkar olunmuşdur.
- 21 sentyabr tarixində DSX sərhəd qoşunlarının “Zaqatala” sərhəd dəstəsinin xidməti ərazisində Balakən rayonunun Yeni Şərif kəndi yaxınlığındakı sərhəd zastavasının xidməti sahəsində sərhəd naryadı tərəfindən naməlum şəxsin hərəkəti aşkar olunmuşdur. Sərhəd zastavasının şəxsi heyəti “Silaha” komandası ilə qaldırılaraq hadisə yerinə hərəkət edilmiş və Gürcüstan Respublikasından Azərbaycan Respublikası istiqamətində dövlət sərhədini pozaraq hərəkət edən 1 nəfər şəxs saxlanılmışdır. Araşdırma zamanı saxlanılan şəxsin İran İslam Respublikası vətəndaşı,1974-cü il təvəllüdlü Şukahi Omid Həmid olması, 17.04.2018-ci il tarixdə “Böyük-Kəsik” SNM-dən Azərbaycan Respublikasında Gürcüstan Respulikasına getməsi və 23.04.2018-ci il tarixdə “Şıxlı” SNM-dən GR-AR-ə qayıdarkən Azərbaycan Respublikası Dövlət Miqrasiya Xidməti tərəfindən ölkəyə girişi qadağan olunduğuna görə geri qaytarıldığı üçün dövlət sərhədini qanunsuz yolla keçməyə cəhd etməsi müəyyənləşdirilmişdir. Saxlanılan sərhəd pozucusunun üzərində ona məxsus İran islam Respublikası pasportu, şəxsiyyət və sürücülük vəsiqələri, bank kartı, 429 AZN, 50000 İİR tüməni, 2 ədəd yaddaş kartı, 1 ədəd “İphone-5 S” markalı mobil telefon, 1 ədəd İİR-ə məxsusu sim kart, 1 ədəd əl fənəri, 1 ədəd bıçaq, “powerbank”, geyim əşyaları və ərzaq məhsulları aşkar olunmuşdur.
- 26 sentyabr tarixində Dövlət Sərhəd Xidmətinin sərhəd qoşunlarının “Göytəpə” sərhəd dəstəsinin xidməti ərazisində Biləsuvar rayonu Biləsuvar kəndi yaxınlığındakı sərhəd zastavasının xidməti ərazisində qabaqlayıcı əməliyyat məlumatına əsasən 1 nəfər sərhəd pozucusu saxlanılmışdır. Araşdırma zamanı saxlanılan şəxsin Azərbaycan Respublikası vətəndaşı, Şəmkir rayon sakini 1998-ci il təvəllüdlü Tofiqzadə Pərvanə Elşən qızı olması və İran İslam Respublikası vətəndaşı ilə ailə qurmaq məqsədilə 2017-ci il ilin dekabr ayında Culfa SNM-dən qanuni yolla İran İslam Respublikasına getməsi, lakin İİR vətəndaşının həyat yoldaşı və qohumları onları evdən qovduqları üçün uzun müddət ayrı-ayrı şəhərlərdə yaşamaları müəyyən edilmişdir. P.Tofiqzadənin verdiyi məlumata əsasən ona məxsus olan Azərbaycan Respublikasının ümumvətəndaş pasportunu ailə qurduğu İİR vətəndaşı tərəfindən əlindən alındığına görə dövlət sərhədini qanunsuz yolla keçmək məcburiyyətində qalmışdır. Sərhəd pozucusunun üzərində 1 ədəd “Samsunq” markalı mobil telefon, 30 AZN, 1 ədəd hesab kartı, şəxsiyyət vəsiqəsi və 1 ədəd əl çantası aşkar olunmuşdur.
Qeyd edilən faktlar üzrə əməliyyat və istintaq tədbirləri davam etdirilir.
Dövlət Sərhəd Xidmətinin Mətbuat Mərkəzi